Kur vendosni për një kuzhinë ose garderobë me porosi, pyetja e parë është zakonisht: MDF i lyer apo ivericë? Të dyja duken mirë ditën e montimit. Ndryshimi duket pas disa vitesh përdorimi.
Çfarë është MDF i lyer
MDF është pllakë e dendur nga fibra druri. Ne e presim në masë, i frezojmë profilet e dyerve dhe e lyejmë vetë në fabrikë, në disa shtresa. Kështu mund të marrë çdo ngjyrë, mat ose me shkëlqim, dhe skajet mbeten të buta, pa shirit anësor.
Ia vlen kur:
- doni një ngjyrë të veçantë, jo vetëm ato të katalogut
- doni dyer me profile ose doreza të frezuara
- kuzhina përdoret çdo ditë dhe doni që të zgjasë shumë vite
Çfarë është iverica
Iverica është pllakë e veshur në fabrikë me një sipërfaqe të gatshme, në dizajne guri, betoni, të bardha ose druri. Skajet mbyllen me shirit.
Ia vlen kur:
- buxheti është më i vogël
- bëhet fjalë për dollapë të brendshëm, rafte ose dhoma fëmijësh
- ju pëlqen pamja e drurit ose gurit pa kujdesin që kërkon materiali natyral
Si zgjasin
MDF i lyer është më i qëndrueshëm, sidomos rreth lavamanit, furrës dhe pjatalarëses, ku ka nxehtësi dhe lagështi. Te iverica, pika më e dobët janë skajet me shirit, që me kohë mund të ngrihen nëse lagen shpesh.
Prandaj garancia nuk është e njëjtë për të gjitha materialet. Ne e shkruajmë garancinë për secilin material në ofertë, që ta dini para se të filloni.
Një zgjidhje e përzier
Një zgjidhje e mirë është MDF i lyer për frontet që shihen dhe preken çdo ditë, dhe iverica për brendësinë e dollapëve. Kështu kuzhina duket dhe zgjat si MDF, ndërsa çmimi mbetet më i arsyeshëm.
Shikojini nga afër
Ngjyrat duken ndryshe në ekran dhe në dritën e shtëpisë suaj. Gjatë matjes falas ju sjellim mostrat e të dy materialeve, ose mund t’i shihni në sallonin tonë në Pejë.